"Үүлэн домог" Mиний омог

"Үүлэн домог" дууны маань клип гарчээ.Уран бүтээл хүнд хүрэхэд  урам зориг,онгод хөглөгдөж улам хийж бүтээх эрч хүч амтагдах бөлгөө.Монгол түмний уламжлалт урлагийг орчин үеийн поп урсгалтай нийцүүлэн таацуулж энэ бол "Монгол поп" хэмээн хүлээн зөвшөөрөгдөх урсгалыг бий болгохоор зорьж,түүндээ хүрч  яваа Д.Болддоо талархал илэрхийлье."Монгол поп" 1,2 цомгуудын хит болох "Хагацаж чадах уу","Үүлэн домог" дууны шүлгийг тэрлэсэндээ омогшиж байна."Үүлэн домог" уран бүтээлийн минь омог.

Орой намрын "уянгат" шувууд

Салхит хотын тэнгэрт бороо зүсрэс гээд уйтайхан.Шувууд хэдүйнэ буцчихсан намар орой цаг сан.Гэхнээ намар болгон шувууд буцдаг биш юмсанж.Шувууд ирдэг намар гэж бас байх аж."Уран үгсийн чуулган"д чуулахаар эх нутаг  Монголоос,эрх чөлөөний суугуул нутгийн өнцөг булан бүрээс эгшиглэнт олон шувуу нисэн ирж салхит хотын их нуурнаа хэд хоног ганганалданхан жаргавай.Ардын уран зохиолч,Соёлын гавъяат зүтгэлтэн П.Бадарч,МЗЭ-ийн гүйцэтгэх захирал,яруу найрагч Г.Мөнхцэцэг,гавъяатгүй ирээд гавъяатаа гэж дуудуулж буцсан яруу найрагч Дан.Нямаа,модернист гэвэл Монголын нохой ч үл андах яруу найрагч Б.Галсансүх нарын зэрэг алдар цол,ачаа номондоо дарагдсан,далавчнаас нь дөрвөн уулын утаа үнэртэх,ярихад нь яруу найраг амилах хэдэн шувуу эх орноос минь зорин ирж "Уран үгсийн чуулган"ыг чимсэн билээ

Өвөрлөгчийн тавилан

Өвөрлөгч түмэн минь

Өөрөө хүсээгүй тавилан минь

Хүсэвч буцааж өгөхгүй

Хүнийх болсон Монгол  минь

Хаяа хатавчаар нутагтаа хаягдаж

Халх Монголынхоо өмнөөс золиослогдож

Хиагтын гэрээ нэртэй их гүрнүүдийн наймаагаар

Хятадын аманд шидсэн Хөх махны тасархай минь

Мэдээжийн юмыг мэдээгүй толгой буюу "Элгэн хутга" ФМ 96.9

Aндрoид утсан дээрээ татаж суулгасан "Элгэн нутаг" FM радиогоо асаалаа.Эх оронд маань нэгэн гэгээн өглөө эхэлж байгаа бололтой.Хөтлөгч бүсгүй ялдамхан хоолойгоор

-За энэ бол мэдээж "Элгэн нутаг" ФМ 96.9

Мэдээж нь ч юу чив дээ.Муухан мушийв.

-Мэдээж яг энэ цаг мөчид эх оронд маань 8 цаг 13 минут айлчлан ирээд байнаа.Өнөөдөр бол мэдээж Дөрвөн сарын нэгэн инээдмийн баярын өдөр.

Бухимдалын утаа уугиж эхлэв.8 цаг 13 минут айлчлан ирээд байх даа ч яахав.Ямар нэгэн улирал,аль нэг улсын ерөнхийлөгч,усны шувуу,холын зочин,өвлийн өвгөн биш дээ.Хоёр мэдээж нь эгдүү хүргэсэн ч маргааш дөрвөн сарын нэгэн гэдгийг (Манай энд цагийн зөрөөтэй) сануулсан болохоор нэг мэдээжийг нь нэг удаа өршөөн хэлтрүүлэв.

Хайрхан уул

Алтан нутгийн минь авъяаслаг залуу хөгжмийн зохиолч СТА Б.Эрдэнэбаяр хүүхэд ахуй цагтаа бичсэн "Хайрхан уул" шүлгэнд минь аялгуу оруулж дуу болгон амьдруулжээ.Энэхүү дууг Дундговь аймгийн Төв Халхын Дуулалт Театрын гоцлол дуучин CTA Төмөр дуулж олны хүртээл болгосон аж.Монгол хүн бүрт сэтгэлдээ сүслэн дээдэлж залбирч явдаг "Хайрхан" байдаг.Moнгол орныхоо сүрлэг уулс,тахилга сүлдэт овоо,хайрханы зургуудаар чимэглэж дуугаа youtube дээр орууллаа.Таалал орших болтугай.

Хэрвээ би гахай байсан бол

Заримдаа надад нээх утгагүй тэнэг тэнэг бодол төрдийн.Өнөөдөр л гэхэд юм юманд сэтгэл чилүүрдсэн хүн төрөлтөн байснаас гахай байсан нь дээр санагдаад.Тэгээд ургуулаад бодлоо.Би ер нь ямаршуухан гахай байх нь вэ,миний гахайны амьдрал ямар байх болоо гэж.Мэдээж би эрэгчин гахай байж таарна.

Цэцэгс амархан хагдардаг,харин хогийн ургамал амь бөхтэй

Арав гаран жилийн өмнө юмсан.Зүдүүхэн цагийн ядуу оюутан явлаа.Тарчигхан оюутны байрандаа шуугиантайхан суудаг байлаа бид.Утга зохиол,сэтгүүлийн ангийнхан болохоор дэврүүхэн гэж ч жигтэйхэн.Шүлэг зохиолоо шүлс үсэргэн уншицгааж,шөнийн дэлгүүр рүү ганц юманд харайж,жижүүр авгай нарыг найрч явсан үеээ одоо санахад дурсамжтай ч гунигтай ч юм шиг.Манай тасагаар "том" зохиолчдын десант байсгээд л бууна.Том зохиолчид гэдэг нь тухайн үед уран бүтээлээрээ олонд танигдаж 90-ээд оныхноосоо ялгарч эхлээд байсан Ж.Болд-Эрдэнэ,Ш.Уянга,T.Содномнамжил тэргүүтэй хэсэг найрагчид.Бас тэднийг дагалдан баясч ч гэх үү эсвэл дагуулан явж нэр нүүрийг нь ашигладаг ч гэх үү хэсэг нөхөд ёс юм шиг хамт явах.